نحو وسطا اكثر هزازاً
يا مصر الله عليكى!
عمرانه دايما بفديو كليباتك..
يا سلااام كده لما دايما الامة العربيه واقفه جنب شبابنا الامامير
بتساعدهم دايما انها متخليهمش لا يلفوا ولا يدورا ولا يحتاروا
لما الشاب يحتاس عن الانحراف خارج البيت
القنوات الرائده فى صناعه الهلس تجيبله الانحراف لحد عنده-ولا اجدعها طياره بسرعه الصوت!- و تجيبلنا لبعض الناس الشلل..
وبكده العلاج يكتر فى البلد..
و الصيادله يكسبوا و الاطباء يكسبوا..
يعنى من اخر خطه اقتصاديه محكمه!
وانا بدعو كل رجال الاعمال انهم يجتمعوا و يطالبوا بنزولها فى المقررات و المناهج لدى دارسين التجاره و التسويق وسواقه الهبل على الشيطنه كمان علشان محدش يزعل بس
يعنى انا مس عارفه الناس الى بتسمع عبد الحليم ولا فيروز دوله على ايه!!
عالم غريبه اوى بصحيح..يا سلاام على الطرب الاصيل
و الهزازان الى على اصله من ايد اختنا المجيده نجلاء..
و لا المعلمه الكبيرة بوسى سميير
يعنى مش عارفه كل الفن ده و تلاقى فى اباهات مانعين القنوات التعليميه الاولى فى العالم العربى ومشفرينها!
تفكير رجعى .. فعلا!
بس بكرة يعرفوا قيمتها و يقدروا قد ايه هى مفيده للبلد يعنى..
وعمار يا مصر يا مهززة اوساط بناتك!
7 comments:
انا فاكر من كام سنة لما كان الدش لسة جديد فى مصر كنا نستغرب من كمية قنوات الاغانى فى تركيا وكانوا ايامها حوالى اربع قنوات بس وكنا مستكترين اربع قنوات على بلد زى تركيا كلها اغنى بس
النهاردة فى مش عارف اعد بصراحة القنوات اللى بتدعى انها بتقدم اغانى وهى فى الحقيقة عبارة عن اعلانات مدفوعة الاجر عن النسوان والعيال اللى بتغنى
احنا عندنا خلط شديد بين شخصية المطرب او المؤدى لاغنية وعينة وبين مفهوم السكس ستار
يعنى مش كل واحد بيغنى المفروض يبقى امل البنات واللى كل بنت بتحلم بية (احلام وحشة خالص)
وبرضة الحال نفسة بالنسبة للمطربة كل واحدة مش طالعة علشان تغنى وبس لا تحس ان الموضوع فية شىء مستخبى او انها بتعمل شفرة مثلا
حاجة تانية مش مقصود بيها انها تغنى وبس
--------------------
انا مش فاكر مين اللى قال ان عبد الناصر قضى عمرة يعلمنا ان نلبس ما نصنع
والان يأتى حفيدة صاحب قناة ميلودى ليعلمنا ان نقلع ما نلبس
ايوه مهى فيها مصلحة اهو مش هتكسب الصيادلة وبعدين الثقافة بتزيد كده فى بلدنا وربنا يستر على 2010 هتكون وصلت لايه
هوا انتي عندك عداوة ما بينك وبين اصحاب النضارات
أصلي مش شايف حاجة خالص من المكتوب
مع ان اصحاب النظارات بقوا نص المجتمع ولهم حق برضه
بلاش ظلم وكبروا الخط المرة الجاية
===
عموما دي بلد محكومة من وسطها لالتزام حكومتنا التام بمسك الأمور من وسطها
adhm:
هو مش حكايه ان احنا الى عندنا خلط والله
بس المفترض يعملوا قنوات بقى متخصصة غير الاغانى يعرضوا فيها الى هم عايزينه .مش نكون مثلا بنسمع اغنية لكاظم الساهر وفجأة تلاقى الاغنية الى وراها بتقول(كوكو واوا )يعنى يفرقوا شويه..
فعلا انا برضة مستغربة من حفيد عبد الناصر.. انا مش ناصرة بس احترم عبد الناصر الى مظنش ان حفيدة بيحترمة بالشكل ده ابدا...
وحلو جدا جدا الحته الاخيرة من ردك
محمد:
بأذن فى 2010 هنكون وصلنا لاعلى مراحل الثقافه و المكسب الصراحه..
هايبقى اتممنا خطة فديو كليب لكل مواطن
صباحك سكر:
منورة البلوج يا جميل ومسكراه..
انتى للاسف مفهمتنيش صح.. انا مش كارهه البلد ولا حاحه
بالعكس انا بحب مصر جدا و عارفه ان فيها مليون حاجه جميله جدا
بس هو الواحد علشان بيحب البلد بيتكلم على الحاجات الى بتشل فلازم يخرجها بره شوية..
علشان الامراض مش اكتر
عموما نورنى وجودك
حائر فى دنيا الله:
يا مرحب بيك اولا فى البلوج
و ثانيا انا كمان من اصحاب النضارات و ان كنت لا استخدمها فعليا..بس اهى موجودة بتذكرنى ان فى ناس بتشوف احسن منى:)
بس يا فندم انا كبرتلك الخط ده انت تؤمرنى
ياريت تقولى هل عرفت تشوفه كده ولا نكبرة تانى
اسعدنى مرورك:)
والله مشكلة الهوجة االلى طلعة فيها القنوات الغنائية الفضائية
ولااسف اغلبية الطربات فيها قادمين وسط اليل وما ادراكى ما الليل واحدة زى بوسى ليها ملفات فى الاداب وغيرها فى مصلحة من تصدير هذى الاوباء الينا
اعتقد انها حاجة تلهى الناس عشان الحكومة تعرف تشتغل
شكرا على البوست الجامد دة
الى الامام
مالها نجلا وبوسى سمير
بيقدمو اسفوخس عفوا فن
وثانيا هى المشكلة فى ايه سيادتك
ما هى الحضارة والتقدم عندنا كلها وسطية وليس فكرية او علمية
صوتك حلو للواد والبت يسالوها بتعرفى تهزى وسطك
دى حضارة وتقدم ورقى
شوفى وبما اننا شوية جهلة محرومين ( كما يتوقع او يرى البعض ) فيقولك نسليهم مين يعنى اللى حيتفرج على قناة تعليمية
طب والله انا كنت احيانا بتفرج على برنامج الاطباء اللى بييجى الساعة 6 الصبح ( علشان مفيش حد يشوفه ) على الرغم من انى مليش علاقة بطب
بس دلوقتى لو دكتور معروض على قناة قدامة عملية جراحية
وقناة تانية عليها هيفاء ولا بوسى سمير مع اعلان جامد
احكموا انتو بقى
...............
طبعالسه فيه ناس محترمة
تامر:
والله يا سيدى مطربات جاين من وسط الليل من وسط النهار مينفعش نطلق عليهم لفظ مطربات اصلا!!
عموما ميرسى كتييير على مرورك الجميل ده
نورتنى
طاهر:
والله عندك حق..
بس يمكن فى استثناء لقاعده انه لو فى فديو كليب مسخرة و برنامج تعليمى للاطباء مثلا هلاقى اخويا اختار البرنامج عــــدل
بلا فخر اخويا عنده نداء كده اسمه اللزقه لاى معلومه طبيه
ويرجى مراجعه بوست (هو ايه حكايه بتوع طب)
ومبرسى كتييييير على وجودك
نورك غطى على الكهرباء
محمد يوسف:
اولا برحب بيك فى البلوج
صح دى نظريه اخرى
انا سمعت برضه انه باين فى فتره النكسه او قبلها او ما بعدها انا والله ما فاكرة ماكنش فى رقابه مثلا على الافلام الامريكيه والغير امريكيه ولا اى حاجه لمجرد ان الناس متاخدش بالها من الى بيحصل فى البلد!!!
وتحيا الديمقراطية يعنى
و ياريت متخليش دى اول و اخر مرة تعدى على هنا
نورت
Post a Comment