12/29/2009

Facebook Remarks


I hate who likes his own photo\status\link...we know you like it otherwise you wouldn't have put it in the first place..
And those who take that stupid personality tests and getting worked up on the results like you're the bravest most handsome man\women alive as if Freud himself woke up from his grave and gave them the result !
grow the hell up people!
You Narcissistic Bastards.

10/02/2009

علشان تعرفوهم روحوا شجعوهم!

دى الحملة الجديدة لكوكا كولا لتعريف الشعب المصرى بمنتخب الشباب
الى بيلعب فى البطولة الى بتستضيفها مصر (كاس العالم للشباب)
طبعا اكيد كلنا عارفين ان فى بطولة مصر بتستضيفها حاليا..جايز مش كلنا عارفين ايه هى البطولة
واكيد مش كلنا عارفين مين هم الشباب الى بيلعبوا فيها ولا حتى الفرق
دى اكيد مش غلطتنا لانه مفيش دورى كانوا بيلعبوا فيه كلهم نشوفهم منه..ولو كان فيه اصلا فمبيجيش فى التليفزيون فالى هيتابعه ده من جهوده الخاصه احييه عليها:D
انما المهم فى الموضوع انه فى ناس بتلعب باسم مصر بغض النظر عن اننا واثقين فى قدرتهم على الوصول للنهائى اكيد
ولكنهم اختيروا بعد تلات سنين تحضير للبطولة دى مع مدرب اجنبى اسمه سكوب ومعاه جهاز فنى عريض طويل اوله هانى رمزى
فاحنا بنشجعهم لاننا اتعودنا اننا نشجع منتخب مصر بكل مراحله
انا فاكره من سنين كتير فاتوا نفس البطولة دى كانت بتتلعب فى كندا على ما اظن
ووقتها منتخبنا للشباب برضه وقفنا معاه و شجعناه مع اننا مكناش نعرف اسمايهم بس عرفناها من مواهبهم
ومن لعبهم و حفظنا اسمهم كلهم ..من غير اى ااعلانات على الاقل انا متفرجتش على اعلان ليهم
وقتها كان فى شيتوس و محمد صبحى و جمال حمزه و ناس تانيه كتير فى الى لسه بنسمع اسمه و فى الى تاه فى الزحمه
دلوقتى البطوله دى ميزتها انها مقامة على ارضنا ..والتشجيع هياخد فرصته اكتر معنويه للشباب دولة
وشركة كوكا كولا عملت مجموعه من الاعلانات علشان تعرفنا بالشباب الى بيلعبوا
طبعا دى فكره جميله جدا..ولكن تنفيذها هو الى عليه الجدل

الاعلانات عباره عن لاعب من المنتخب او المدير الفنى فى موقف من المواقف ثم يتم الاعلان عن اسمه و المركز الى بيلعب فيه
الموقف المفترض انه كوميدى و انا عن نفسى بضحك جدا منه واى حد بيشوفه قدامى بيبقى ليه نفس رد الفعل
بس انا لقيت ان فى ناس استائت من الاعلانات دى
وقالت انها بتسوء صورة مصر او بتفترض ان معامله اللاعيبه تبقى غير معاملة الشعب
انا عايزه اقول هتسوء صورة مصر على اساس ان الاعلان ده هو الاعلان الرسمى او الوحيد الى فى مصر مثلا؟؟؟
ده اعلان المفترض معمول علشان يضحك فى موقف طريف قصير وعلشان يثبت فى دماغنا و معاه اسامى اللاعيبه
لانه مظنش ان الشعب المصرى دايما قليل الذوق كده واكيد فى نماذج وقله الذوق دى بتبقى على الكل مش هتفرق بقى لاعيب من سياسى
والاعلان بيفترضش على حد انه يعامل الاللاعيبه بترحيب زياده ولا نديهم حاجات ببلاش مثلا
ولكن التعامل العادى الى الواحد بيعامل بيه انسان زيه وفى نفس الوقت بيحبه
ومحدش يقدر ينكر ان لاعيب كرة مشهور او حتى فنان مشهور بيتلاقى بترحاب من الشعب
بس ده مش معناه ان بقيه الشعب يتعاملوا بطريقه مهينه!!!
انا حسيت ان الهجوم على الاعلانات تكبير للموضوع واعطاءه حجم غير حجمه
المواقف كوميديه بحته ومش بتفترض حدوثها فى العادى
لان اساسا لو اى واحد فى مكانهم هيتصرف بطريقه تانيه غير الى اللاعيبه اتصرفوا بيها وكل واحد هيقول انا كان زمانى عملت كذا و خدت حقى!
فخلاصه الكلام ..الاعلانات ادت وظيفتها الى حد كبير
عرفت الناس ان فى منتخب بيلعب و دى اسمائهم ..والى عايز يروح يشجع بقى يروح

ودى لينكات لبعض الاعلانات دى:
http://www.youtube.com/watch?v=Ej77GTsNdo8&translated=1
http://www.youtube.com/watch?v=E0O2AZThzc8&translated=1

6/22/2009

منك لله يا عمرو يا اديب

منتخب مصر دخل بطوله كاس القارات و كل الناس بتستهزىء بيه
وكل تعليقاتهم قبل الماتشات هزيمه بال 8 و ال6 فى كل الماتشات حتى ماتش امريكا
وحققت مصر المفاجاه بهزيمة فى اخر دقيقه من ضربه جزاء صحيحه بقرار خاطىء من الحكم من البرازيل
و فاجئت مصر العالم كله و قبليه المصرين الى كانوا بيشتموه
و المصرين ابتدوا يتفائلوا و قالوا احنا ممكن نؤدى عرض قوى نفس المستوى مع البرازيل
و قالوا ايطاليا هتعمل فينا و فينا بسبب الدفاع المتهتك بتاع مباره البرازيل
و تاتى مباره ايطاليا و يفوووووز المنتخب المصرى و حطوا جنب الفوز مليون الف علامه تعجب
لانه محدش كان يتخيل ولو لمليون سنة الى حصل ده
و نبقى اول منتخب افريقى و عربى فى تاريخ ايطاليا يهزمها فى بطوله للفيفا
و طلعت مصر و احتفلت و معاها العالم العربى كله و كلهم مش مصدقين

و نسيت ااقول كل الانجازات دى حصلت من غير فراوده مصر الاساسيين و بالناس الى ادت اسوء اداء فى الجزاير
و الدورى المصرى

كل الكلام ده جميل و محدش يقدر يعترض عليه

و يامل المصريين فى التاهل لنصف النهائى بسبب العروض القوية
و تاتى الهزيمة بالتلاته امام منتخب امريكا ليتأهل بدلا منا و من ايطاليا بطلة العالم
و هنا بقى يحصل الى محصلش ..
مصر كلها استائت و ليها الحق علشان اللاعيبه ملعبش حلو
معذره ولكن:
انتوا ناسين انه مفيش فراوده و زيدان الى حيلتنا اتصاب
المنتخب كان بيتنقل كل مباره لبلده و لعب 4 مباريات فى اقل من 10 ايااااااااام
ده لو حصل فى اى وقت تانى المنتخب كان زمانه اعتزل من زمان
و المنتخب ادى اقوى عروضه و لعب مبارايات العمر و اللاعيبه كلها اتصابت فى مباره ايطاليا او مباره امريكا
و كانت تغييرات حسن شحاته اضطراريه بسبب الاصابات!

مش هاقول اكتر من مين كان يتخيل ان مصر تفوز على ايطاليا بطله العالم
و تحرج البرازيل!

خرجنا من البطولة الى كده كده كنا هنخرج من النصف نهائى على ايد اسبانيا
مهما كان المعجزات لا تستمر

الكلام الى لازم يتقال ان كلنا نقف مع المنتخب لانهم ابطال عملوا الى ميتعملش و فرحونا فى ماتشين محدش كان يتخيلهم
و ان الناس فى كل المنتديات الاجنبيه للكورة تقولك عايزين مصر فى كاس العالم و مستنينهم
ده الى حققه منتخب مصر
الخساره شىء طبيعى فى الكورة الى مصر نسيته
لان ايطاليا خسرت مبارتان و ده الناس مش راضيه تبصله



نيجى لاسوء حاجه حصلت النهارده اسوء من الهزيمه
ان الشخص الى اسمه عمرو اديب يعلق على الهزيمة ويقول ان سببها هى البنات الى لاعبى المنتخب طلعوهم ماهم فى الاوض
وعلشان كده المنتخب مأداش و ان المنتخب اتسرق منهم


اولا :
المنتخب اتسرق فى يوم ايطاليا
اى انه لو فى بنات فده قبل ماتش ايطاليا
وكان الاجدر ان اللاعيبه متأديش فى مباره ايطاليا الى فازت فيها
مش هيأثر على ماتش امريكا

طيب و ايطاليا اتهزمت ماتشين هى كمان كانت معاهم ستات كل ماتش!!!!

وثانيا:
جنوب افريقيا خايفه على سمعتها و علشان كده طلعت الكلام بتاع البنات ده علشان لو فى اى حوار على الامن
فرصها فى استضافة كاس العالم هتقل

وثالثا:
احنا مسلمين و عاقلين و عندنا فى ديننا و اخلاقنا بيقولك الكلام الى يمس العرض و الشرف
الى ينقله و يردده شايل للذنب
يا جماعة كله الا الكلام فى الشرف
دوله احسن جيل جه و عدى على مصر فنيا و دينيا
ومبيعديش علينا مباره غير و نسمع المسابقات الدينية الى ما بينهم
و السباق منهم على تخليص القران او اداه الصلاه فى اوقاتها

اذا كان العالم كله بيردد الكلام الى مالوش اى صحه يبقى احنا المصريين منسمحش ان الكلام ده يتنقل ما بينا ابدا
حسبى الله و نعم الوكيل فى الى اثار الكلام ده و خلى ناس تمشى وراه زى الهبل من غير ما يعرفوا عاقبه ترديد حاجه زى كده

يا جماعة مصر عملت الى ميتعملش اولا و خلت العالم كله يسمع عنها و يتمنى يشوفوها
و مش هيفرق معاهم خساره لان العالم عارفين يعنى ان الكورة فيها مكسب و خساره
المهم مع المنتخب دلوقتى هو التصفيات لكاس العالم
لازم نقف ورا المنتخب
و نقابلهم و نحتفل بيهم كمان لانهم شرفونا
دوله بيسجدوا بعد كل هدف يا جماعه
حسبى الله و نعم الوكيل

( يا أيها الذين آمنوا إن جاءكم فاسق بنبإ فتبينوا أن تصيبوا قوماً بجهالة فتصبحوا على ما فعلتم نادمين) .

ارجوكم ارجوكم محدش يمشى ورا الكلام ده

6/10/2009

a story of a kind!

هو انا ماكنتش ناويه على انى اكتب حاجه بس هى جت تلقائيه و انا بهزر مع واحد
وكتبتله دى كقصة قبل النوم!!


There was a little boy somewhere in the world
When he wakes up every day he wonders
All my dreams are sad and tears are always on my cheeks
Did I do something bad? Why do my eyes always leaks?
Why does it happen to me? when I have everything I seek?
Mama tell me please ,why can't I be happy in my dreams
She tells him he is cursed coz everything he has,
And he shouldn’t be sad like this:
it's just a dream my little child
it will go away in a bit
just keep your smile little child
and come here with me and sit

and not so far away from here was another girl with a similar tear
she had no toys and no friends to play with
she seems so sad almost all day
there’s nothing to brag about in her life
happiness is only in her dreams which she longs everyday

mama tell me please, why can’t I be happy like in my dreams.
She tells her good things always hide away somewhere
we just don’t try so hard to find it and hope not to be astray.


it's just a dream my little child

it will go away in a bit
just keep your smile little child
and come here with me and sit

5/30/2009

ممدوح عباس اه و مرتضى منصور لا

انتهت امبارح انتخابات الزمالك ولاول مرة فى تاريخ الزمالك تبقى الانتخابات بالمنظر ده
من حيث المتابعة الاعلامية قبل و اثناء الانتخابات(تلات قنوات من الصبح لايف)و حضور اعضاء الجمعية العمومية للزمالك بالمنظر ده
محصلتش فى تاريخ اى نادى قبل كده  و اكيد الكل عارف ليه المرة دى الناس كلها راحت
اه انا عن نفسى مروحتش..بس لان ماما هى الى كان ليها حق التصويت و ماكنش ينفع الست تروح لوحدها وسط الهوجه الى 
الواحد شافها هناك دى..بس فعلا فرحت بالنتيجة الى طلعوا بيها فى الاخر
الواحد كان متابع طول اليوم و سهرنا لغايه الفجر علشان نعرف و نتأكد و نفرح  بالنتيجة
حتى لو كان ممدوح عباس مش هو اصلح من يقود الزمالك بس مين غيره دلوقتى رشح نفسه و ينفع يبقى قدها
كان نفسى دكتور عامر يرشح نفسه الراجل اثبت انه بيعرف يدير نادى كبير..
ولكن اهم حاجه انى مشفش الاستاذ  مرتضى  منصور ده ماسكها!!
بجد كانت هتبقى نهاية الزمالك بحق وحقيقى
انا فى حياتى مشفتش شخصية بتعيش على  اهانة الاخرين او اكاله الاتهامات ليهم بالمنظر ده
احنا كرهنا الخناقات و التعصب و القرف الى الزمالك كان عايش فيه كل السنين الى فاتوا دوله
احنا عايزين واحد يمسك النادى  بهدوء من غير بروباجندا و قضايا و لو محصلش ايه هاوديك على القسم
..
ممدوح عباس مش الاحسن بدليل  انه من اوائل تصريحاته امبارح بعد الرئاسة انه هيرجع جمال و شيكا و اجوجو
يا خرابى ..اول القصيدة كفر..بس هاقول لسه الايام جاية و هنشوف هيعملها فعلا ولا لاء و لما هيرجعوا هايبقوا عاملين ازاى
انا كزمالكاوية شفت النادى و اللاعيبة  عاملين ازاى اقدر اقول بكل ثقة انى مش عايزه لا جمال ولا شيكا بجد..
الى مش عايز النادى ولا هيتجنن عليه ,يروح يشوف حتة تانية احسن..
بكل بساطة و بهدوء ولا انا عايز امشى و تهديدات!!
الزمالك اصلا خلص الموسم على المركز السادس يعنى وجودكم عدم وجودكم مفرقش كتير يا لاعبيتنا يا كبار..
فالى هيفرق بجد انكم تاخدوا شنطكم  بجد و تمشوا  و تأدوا فى النادى الى يعجبكم 100% 
او يأما تخليكم فى الزمالك و برضه نشوف ال 100% ..
لان الزمالك  مش عايز من حد احسان  ولا شفقة و لعبكم معاه مش تؤدية واجب..
دى كلمة شيفاها طالعة من اى زمالكاوى لاى لاعيب دلوقتى فى النادى
و نفسى الكل يفهم ان زمن الى كان الزمالك فيه بيسامح ماعدش موجود..
يا فيه عطاء يا فيه قضايا:P
وربنا يبعد عنا القضايا يااارب

4/17/2009

the first comedy rumble in egypt!

hello cairo
and welcome to the first ever comedy rumble in egypt!!

دى اول حاجه اتقالت فى الكوميدى رامبل فى الحفلة الى اتعملت النهارده فى دار المؤتمرات..
,وهى للى ميعرفش عباره عن stand up comedy
اى كوميديا على الواقف..النوع ده من الكوميديا يهتم بكوميديا الموقف(نظام انا وانا ماشى اتكعبلت و..)..مش على الافيه
(مرة واحد اتكعبل:))

انا بحب جدا النوع ده من الكوميديا لانك بتحس انها حاجه تمسك انت بشكل او بأخر وبتلاحظها فى كل حاجه حواليك
ولو مخدتش بالك هتخليك تاخد بالك منها..فهى كوميديا مقبولة ,اه هى بتعتمد على السخريه على الغير بدرجه كبيره بس على الاقل السخريه فى مكانها و ممكن تتعدى عادى مش زى النكت الى بتتقال دايما على حبايبنا الصاعيده و من وراهم البورسعيديه

...

الحفلة كان معمولها بروباجاندا كبيره وحسيت ان الناس عرفت ان فى حفله اه جايز مش كلهم او اغلبهم عارف يعنى ايه الكوميديا على الواقف
وغالبا مسمعوش حاجه زيها قبل كده..بس كلمه كوميديا على ما اظن هتشد الناس فى الوضع المنيل الحالى انهم يقبلوا يروحوا اى حاجه

العدد الى جه فى الحفله الى انا حضرتها الى كانت الحفله الصباحيه(مش صباحيه اوى كانت الساعه 4 بس كانت فى واحده تانيه الساعه 9) كان الناس فيها كتااار فعلا
مش زى مانا توقعت هايبقوا حبه صغيرين خصوصا انه اكيد ان الحفله بتاعه الساعه 9 هى الى هتاخد الاهتمام من الناس اكتر(ده يوم جمعه برضه و الناس عايزه تسهر)


يمكن الحاجه الى استغربتها شويه كانت اسعار التذاكر الى نسبيا عاليه اول تذكره كانت 75 ,125,175,215 اه هى ال75 ادت دورها بكفائه و اقتدرا تحسد عليه(كنا قاعدين و شايفين (اه مش وشوشهم بس عادى يعنى هانعمل ايه
بيها(هو انا لازم ااقول كده علشان احسس نفسى ان مفيش حاجه ناقصانى برضه:))


بس فعلا كانت حفلة جاااامده جدا و الضحك مبطلش و ايدينا وجعتنى الى اقصى حد و زورى اشتكى من كتر صيحه التشجيع(الوووه) الشهيره:)
(واه انا من الناس الى بتعمل ووه و توجع ودانكم :P)يعنى لو شوفتونى فى حفلاات ابعدوا عنى احسن:)


المؤديين الكوميدين فى الحفلة كانوا:
1-احمد احمد:مصرى الجنسية بس كان عايش فى امريكا طول عمره هو كان قايم بدور المقدم ليهم و ان كان ده خلااه ميؤديش فقره كامله على بعضها نحس فيها بخفه دمه الى بجد(اه هو كان خفيف الدم جدا) بس هم اكيد غطوا عليه بفقراتهم الاطول منه


2-جورج عزمى

3-معتز عطا الله
4-شريف عزب

5-ماز جوربانى

6-angelo tesrouchasمش عارفه اسمه بيتكتب ازاى بالعربى هو يونانى الاصل مولود و عايش فى كندا و بجد ده اكتر واحد فيهم ضحكنا لدرجه العياط..بجد فعلا خفه دمه رهيبه
7-تيد اليكساندرو
8-اكرم حسنى(غالبا كل الناس عرفاه يعنى علشان شخصيه ابو حفيظه) هو اتكلم عليها من بعيد بس مطلعش بيؤديها يعنى و ده شىء حلو لانى ماكنتش هاحب انى اشوفه بحاجه مكرره الواحد عايز يشوفه وهو بيحكى كوميديا الموقف الى فعلا كان بارع فيها

الحفله عامة كانت وهميه واتكلموا فيها فى كل حاجه
ولم يسلم الامر من ذكر بوش و الجزمه او باراك
بس اكتر حاجه عجبتنى فى الحفله غير يعنى الضحك وكده التنظيم و الاهتمام بالتفاصيل الى فيها
حسيت ان الناس الى ماسكينها فعلا Very professional
زعلى الوحيد هايبقى على انه مفيش حفله تانيه قريب
لانها حاجه هاروحها كل اسبوع لو لقيتها
للناس الى ميعروفهاش ادخلوا على يوتيوب و اعملوا سيرش على اسامى الناس الى كتبتهم
و هتلاقوا فديوهات تشوفوا هتعجبكم الفكره ولا لاء.


4/15/2009

من غير عنوان.

بقالى كتير اوى مدخلتش كتبت اى حاجه هنا
داخله على سنتين بالتمام و الكمال
عارفه ان فى ناس مخلصين ليا(واخد بالك انت) بيعدوا هنا كل شويه يفتكرونى
وبجد انا بشكرهم على متابعتهم التحفه ليا دى
اه انا يبان انى بعت المدونة دى
بس انا لسه مبعتهاش
كتير ادخل عليها .يجيلى نفس اكتب و اتراجع فى اخر ثانيه
معرفش ليه..!

يمكن دى تكون بدايه رجوع و يمكن تبقى كعادتى بكتب حاجه كل سنة مرة
بس حبيت فى مدونتى الى بتعبر عنى ان يبقى فيها ذكر وفاه والدى الله يرحمه

وبرجوكم الدعاء ليه
اه هى متأخره كونه توفى فى 21\11
بس زى ما قولت مينفعش مدونتى حبيبتى ميبقاش فيها حدث زى ده مكتوب
حبيت ادخل ااقول قد ايه انا مفتقداه..
فالحمدلله على كل حال

و..
انتظرونى!
او متنتظرونيش:>
مش عارفه بقى!!