هم عندهم حق ولا لاء؟

يعنى احنا ناس غريبه اوى بجد
كل شويه نبص للعالم الغير عربى
ونقعد نشتم فيهم و نكرههم لأنهم معندهمش دم
و شايفين المذابح الى بتحصل كل يوم فى فلسطين و العراق و الى بتحصل فى مليون حته تانيه وهم واقفين ساكتين مش بيتحركوا كل الى بيعملوه انهم يشجعوا التدمير فينا اكتر و اكتر
و عمرنا ما وقفنا كده نسئل بعض بجد هل هم عندهم حق فى التطنيش ده
يعنى هل احنا الى مدينهم الاسباب فعلا لكده!!
تعالوا كده نحط نفسنا مكانهم -مكان الشباب الاجنبى-
نشوف هم اخدوا ليه الجانب المعارض لينا
وايه الى بنى الفكرة دى عندهم!
يعنى اولا من اول ما الواحد فيهم بيتولد بيسمع عن ناس غريبه كده اسمهم العرب
بيشوف فى الافلام الى بتتقدمله انهم مجرد مجموعه من الهمج
و ان مفيش عندهم لا تكنولوجيا ولا حاجه
بس الفكرة ابتدت تتغير شويه الان
الافلام اتحسنت بقينا -العرب- بنعيش فى عمارات اه زينا زيهم بس الفرق فى التفكير اكيد كبير
مش معقوله هنكون زى المثل الى بيقول "التلميذ الذى تخطى استاذه"
دى نقطه
******
النقطه الاخرى و الاهم و الى بتعمل ضجه كبيرة فى كل حته
هى فلسطين و اسرائيل
ايه الى هم يعرفوه عنهم بالظبط؟
فى تخيلى انه متقالهم ان اسرائيل دى دولة عاديه زى بقيت الدول
و حظها الاسود انها وقعت جنب العرب المتخلفين دولة
وان فى حتة من اسرائيل يسكنها مجموعه من العرب
يسمونها فلسطين
و مصرين-العرب- على ان فلسطين دى تكون دولة مستقلة
يعنى من الاخر معندهاش دم
بقى فى حد يكون جوة اسرائيل الحلم الاكبر و عايز ينفصل عنها
ده اكيد اكتر حاجه تخلى الغرب يفكر ان العرب دولة شويه همج
******
نقطه اخرى
العرب دوله عمرهم ما بيتفقوا على حاجه ابدا!
مجموعه ملهاش غير الكلام و التهديدات
عمرنا ما شوفنا منها حاجه بجد
كل شويه نسمع القمة العربية الكبرى الى هتنعقد
و هنناقش فيها كذا وكذا و حلول كذا وكذا
وفى الاخر صفر - اجدع من صفر المونديال كمان- ده الى هم فالحين فيه
عمرهم ما بيتفقوا على حاجه
وبيطلعوا انيل من الاول
وشويه يقولوا حرب وشويه يقولوا سلاام
طيب مش يتفقوا على وضع الاول!
******
فى مليون نقطه اخرى فى دماغى عايزة اقولها
بس حساهم هربانين منى دلوقتى
بس نكتفى بالكام نقطة دولة
و عايزة كل واحد يحط نفسه مكان الغرب
هل هيبقى دى تفكيرة فعلا!
هل الغرب ليهم عذرهم!
مين الغلطان بجد فى الازمه دى!
احنا ولا هم؟