فيما يتعلق بالصراع الوهمى بين الاخوان و المجلس العسكرى

الموضوع مالوش علاقة بشماتة الثوار او قرفهم من البذر اللى فى البطيخة..احم, اقصد من الوقوف جنب الاخوان فى صراعهم ضد العسكر..لانه ببسـاطة مفيش صـراع أصلا علشان يبقى فى أطراف و الواحد هيختار ما بينهم ..حد يقولى صراع ايه ده اللى ابتدى بتليفونات و مستمر بالبيانات؟ على كده الكون كله بيتصـارع مع نفسه !!
ولو فى صـراع حقيقى هتبقى نتيجته حل البرلمان و ده شىء مستبعد طبعا(المجلس مش غبى لدرجة انه يفقد تعاطف الشعب معاه) يبقى ليه حزب النور مش فى الصـراع ده مثلا يعنى؟ ولا باقى الاحزاب؟
ولا هو مجلس الشعب ده مـاركة مسجلة للاخوان فقط؟!
وحتى لو مش هى دى المشكلة و كانو مختلفين على حاجات تانية..
فين الاعتقالات او الاصابات او السحل او الضرب او القتل؟
فيـن الغضب الشعبى عليهم علشان نزلو يطالبو بحقوقهم و بيتقال عليهم مخربين؟
فـين الاهانة و المرارة فى انهم بيقولو حرية و الناس بتقولهم كفـاية بقى أكل عيشنا؟
فين ما يدل انه فى صراع غير كارتونى ما بين الاخوان و العسكر؟
فيـن ما يدل انه الصراع ده مش على قطعة اكبر من التورتة او انه مش مجرد اختلاف فى وجهات النظر؟
والاهم كان فين التـبادل البياناتى الحمش ده ايام ما فى شهداء بيتساقطو على مدار ايام فى الشهور الاخيـرة و كان اول النـاس اللى بتهاجمنا هم الاخوان..وحتى لو مش مهاجمة فهو سكــوت بطعم الرضا ..

الثـوار قضيتهم ضد الظلم اللى متمثل فى العسكر و غيره واللى خلى ألاتراس الاهلى و الزمـالك يتحدو مع بعض هيخلى الثوار يتحدو مع الاخوان يوم ما يلاقو النية صافية و ثورية المنبع..انما عايزينا ننضم لصراع كلامى مش مفهوم أوله من أخره فمعلش ده مش مجالنا.

احنا بنقول:
عــيــش حــريـــــة عـدالــة اجتمـاعيــة