Storm Thoughts .

There's nothing poetic about pain,
Nothing heroic about withstanding a storm,
Yet the after-effects makes you think somehow big of yourself,As if there's some kind of nobility in not cracking like the broken door beneath your feet..
We crumble during the storm not after it..
Only after the last whistle of the distant wind has gone that we show our heads in pride..
Cause there's nothing poetic about pain !

استقيمو يرحمكم الله

تجدهم فى العالم الغربى يتحدثون عن شخصياتهم العامة المشهورة من دون ذكر لديانتهم بينما نحن هنا نجد ان الديانة شرط أساسى فى الاحتفاء بالمرء من دون ان نعرف حق مقدوره..فعندما يتكلمون عن مالكوم أكس تجدهم يتباهون بدفاعه عن حقوق الانسان و يريدون ان يحذو حذوه و تجد المستمع العربى المسلم يريد ان يسمع اولا انه أسلم ..
حقا ان تعصبنا هو آفتنا ..لا تجعلو بحثكم عما يعزز ديانتكم ينسيكم أهمية الشخصية المتبعة لهذا الدين ! فيصبح أرتباطكم بالدين عن طريق الاشخاص لا عن طريق روعة الدين نفسه !

شهادة د\تقادم الخطيب عن اعتقال عمرو البحيرى و ما حدث يومها

من تجميعة تويتاته فى الاكونت ده
:taqadumalkhatib

عمرو البحيري اسم أتذكره في كل لحظة شاب سجنه العسكر و لفقوا له التهم كنت شاهدا عليها و لم يتكلم عنه احد و لم يسمع به إلا القليل لأنه حقيقة ماحدث لعمرو البحيري كان البداية الحقيقة التي علمت من خلالها أن العسكر لن يتركوا السلطة وان كل ما يقال هو أكذوبة تروج وأنهم مستمرون يوم الجمعة الموافق 25فبراير بعد جمعة القصاص توجهت إلى مجلس الوزراء لأنني حينها عرفت أن هناك لواء جبش قام بالاعتداء على د.ليلي سويف ذهبت لكي أراها فوجدتها جالسة على الأرض وسألتها فحكت لي ماحدث فأخذتها وذهبنا سويا إلى مجلس الوزراء للانضمام إلى المعتصمين أمام مجلس الوزراء
انضمينا للشباب المعتصمين وهتفنا ضد حكومة شفيق وانضم لينا بعدها علاء وزوجته منال ومني سيف أخته وحوالي الساعة 2 دخلت الشرطة العسكرية و ضربونا بالعصي المكهربة اخذت د.ليلي في ايدي وجريت بيها بعدها على طول قبضوا على عدد من الشباب كان من بينهم شاب طالبنا امهم يفرجوا عنه حاولوا ضباط الجيش ابعادنا لكننا رفضنا إلا بعد الافراج عن الشباب تم الإفراج عن الشباب بس فيهم شاب كان وجهه كله دم من الضرب صورته صورة في هذه الأثناء و قبل الإفراج عن الشباب دخل عدد من الأشخاص يرتدون زي المدنيين لمحيط مجلس الوزراء فأوقفهم الجنود لكن أحد ضباط الجيش  قال دول تبعنا د.ليلي عرفت واحد منهم أنه ضابط أمن دولة بدأنا نهتف ليه ياجيشنا ليه أمن الدولة بتعمل إيه، فجابوا لينا الشاب كله دم اتضح ان الشاب اسمه عمرو البحيري، ركبناه عربية علشان يروح يتعالج في منتصف شارع القصر العيني وقفوا السيارة ونزلوا الشباب منها ونوموهم نوموا الشباب وجوههم للأرض وأيديهم متكتفة على ظهرهم وبدأوا في ضربهم، كان الجنود بيشوطوا وجه عمرو وكأنه كورة شراب أسنان عمرو اتكسرت ووجهه كله أصبح دم، جريت بسرعة علشان أمنع الضرب عن عمرو فأمسك بي العسكر وتم أخذي إلى مجلس الوزراء وكذلك عمرو والشباب معاه أنا كنت بأمشي على رجلي بس عمرو كانوا بيسحبوه على الأرض والضرب شغال فيه وهو غرقان في دمه وبعد ماوصل عند باب المجلس سحلوه تاني وضربوه بالعصي ضربوه بالعصي المكهربة وكان بيصرخ من الألم والتعذيب وأنا مش قادر أعمل حاجة له...أخذوني بعدها داخل مجلس الوزراء في في الجراش  حسيت اني فعلا في أبو غريب كان الشباب بيصرخوا من التعذيب والضرب وفاقدين الحركة واللي كان بيضربهم جنود صاعقة لأني لمحت شارة واحد منهم كان شعوري في الحالة دي مخيف وبدأت التساؤلات في دماغي هل من المعقول أن يضرب الجيش الشباب يهذه الوحشية هل من الممكن أن يعذبهم هكذا وجاءتني الإجابة سريعة جدا الضابط اللي كان بيضرب في الشباب طلع وقال أنا حريح شوية بس خليلي حقي في العيال اللي حتدخل دي وبعدين نظر إلى وقال انت تبع مين ومين اللي بيديكم الفلوس انتم خونة و عملاء ودمرتم البلد واقتصاد البلد مش مكفيكم اللي حصل انتو فاكرين انكم لما مشيتو امبارك ومش علشان مشيتوا مبارك خلاص ده احنا موجودين ومافيش حد حيقدر يمشينا واحنا حنوريكم اللي عمركم ماشفتوه.أنا ضحكت لما سمعت الكلام ده وقلت في نفسي الضابط ده أكيد مجنون بعدها طلب من الجنود أنهم يخلعونا ملابسنا خلعنا الأحذية والجواكت والبنطلونات والقمصان وفتشونا تفتيش ذاتي لبسنا هدومنا وبعدين العميد قال انت كانت معاك طبنجة والجنود مسكوها معاك في عربيتك فقلت له أنا ماعنديش عربية فقال هاتوا بطاقته أشوفها عرف من بطاقتي أني مدرس مساعد ف الجامعة فقال الجنود قالوا ان الطبنجة دي كانت مع الشاب اللي بيضرب هناك فقلت له ده كلام كذب الشاب ده مظلوم ولازم توقفوا الضرب والشاب مظلوم ومكانش معاه سلاح ولا أي حاجة رد وقال الكدب والصدق احنا بس اللي نقول عليه مش حد تاني قلت له لو سمحت لازم الضرب والتعذيب يتم وقفه حالا وفجأة جاء له اتصال فرد وقال أيوه يافندم احنا لقينا طبنجة مع الشاب اللي اسمه عمرو  واتضح انها طبنجة صوت بعد ماخلص المكالمة جاءني وقال لي احنا حانفرج عنك بس لو اتكلمت على اللي شقته حتدخل مش حتطلع تاني

Mona Seif:تعليق لمنى سيف على اخر ما جاء فى الشهادة
شوفتوا في شهادة تقادم: لما عرفوا انه مدرس مساعد في الجامعة تراجعوا عن تلفيق تهمة حيازة سلاح له, و خلوها لعمرو البحيري

المسيرات هى الحل :))

انا شايفة اننا نبطل نعتمد على حشد للتحرير و البقاء فيه و نركز على المسيرات الطويلة لانها المهمة دلوقتى لتوصيل صوتنا للناس فى الشارع من غير اى تشويش
اه طبعا المسيرات دى بتلاقى تعنت كبير من الشعب و بناخد شتايم ياما بس المهم نستمر فى التواجد قدامهم علشان نفهمهم اننا مش قليلين و متحمسين
ويوم ورا يوم اكيد هنكسب واحد او اتنين زيادة مكنوش عارفين اللى بيحصل بجد و شايفين شباب قدامهم من كل الاعمار و المستويات موحدين بهتاف واحد
و نفسى كمان يبقى فى مسيرات متتجهش للتحرير او وزارة الدفاع و لكن تبقى كل مسيرة فى منطقتها و تلف توصل صوتنا للناس فى بيوتهم
ايام يناير الاولانية كنا بنلف فى منطقتنا وبس ..وده اللى محتاجينه..علشان يتأكدو اننا شباب 25 اللى زى الورد اللى بيخونوهم فى كل لحظة..
واهم حاجة فى المسيرات دى الاعداد..لازم يبقى الحشد و الحماس متواجدين علشان المواطنين الشرفاء ما أكثرهم و المجلس بيزود هبلهم يوم ورا يوم!
ونفسى مسيرة الازهر تبقى اسبوعية مش علشان بحب اصلى فى الازهر و بس ولكن لاننا محتاجين نقوى شرفاء الازهر و يمكن فى ناس تعدل مواقفها بسببنا :)

الى معارضة المعارضة

فاكرين ايام زمان لما كنتم بتقولو على السياسة ملناش فيها..متتكلموش علشان متتاخدوش..فاكرين لما كنتم بتشوفو مظاهرات متتعداش المية و تشوفو حد بيتسحل و بيموت و تقولو يا حرام انا متضايق بس هاعمل ايه و تكملو حياتكم عادى جدا و تنسوه..

ولما قامت الثورة مشاركتوش مع انكم بتكدبو  و بتقولو على الثورة كلام غلط كتير  سبحان الله برضة من غير ما تكونو شاركتم فيها بس عملتو محللين سياسيين و فاهمين الثورة لازم تمشى ازاى وأساليبها و المشاركين فيها مين مع ان مفيش حد فيكم فكر يتحمق ينزل فيها يجيب حق بلده مش بس كده و كنتم بتحاولو تمنعو الناس كمان من انها تنزل..
موقفكم مفهوم : ماهو انا مبقاش ضعيف و غيرى جبار فى الحق.. منظرى ايه قدام نفسى..كل ده بدل ما يعركم بيقويكم تتكلمو و تهينو فى اللى بيستشهد علشان انتو ضــــعـــاف ..اللى يخليكم مقومتوش للحق طول سنين حياتكم كلها متفتكروش منتظرينكم تقفو جنب الحق دلوقتى وهو واضح وضوح الشمس..
و راجعو كتب التاريخ كويس و اعرفو ان مفيش شعب فى الدنيا بيقوم بالثورة بنسبه 100% او حتى 50% لانه يا بيه لو كان فى 30% حتى من الشعب عنده قابلية انه يثور للحق  مكنش هيبقى فيه لازمة للثورة من الاول كنا كلنا خدنا حقوقنا من زمان..ياللى بتقولو الثوار لا يعبرو عنا..ماهو ده شىء بديهى أساسا!!
هو مبـارك و من وراه المجلس لو مكنش لاقى شعب يستحمره و يستعبده كان قدرو يمسكو و يعملو فيكم ده كله طول السنين دى؟!
انا صعبـان عليا عقولكم و انتو نــاس مش صغيرة و متعلمين بس للاسف مبــارك نجح كويس فى تربية جيــل يبقى هو اول المدافعين عن القهر و اسالبيه
واللى بيقول و مقتنع ان المجلس حقير و مش راضى عن الظلم نستنى وهنجيب حقنا بس بعدين..اقوله هاتلى واحد من اللى ماتو من تلاتين سنة خد حقة لغاية دلوقتى..تفتكر  مين هيجيبلك حقك و السجان و القاضى و الحاكم هم اللى ظالمينك و المفترض توجه ثورتك ضدهم لو موقفتش مع الحق وقت ما بينادى تفتكر مين هيسمعلك لما يكون كله نسيك و نسى حقك ده..
يا جماعة عيب والله دى ثورة مش قعدة عرب هناخد فيها و ندى و نمشى فيها كلام الكبير!
طــريق الحق واضح وربنا هيحاسب كل واحد فينا على اللى بيشوفه و يسئله عملت ايه لنصرة المظلوم..عملت ايه لنصرة اخيك..صدقونى خوفكم دلوقتى لا يقارن بخوفكم وانتم واقفين قدام ربنا..فكر كويس و احسبها مرة و اتنين و تلاتة لان الحسـاب وقتها هيبقى بالحق و عسير..

قال الأمام علي " لا تستوحش طريق الحق لقلـة سالكيـه"

معتز أنور سليمان ..خالد سعيد اخر

بعد خبر وفاة عصام على عطا بعد ما قضو عليه فى سجن طرة والواحد لسه من الصدمة مافقش
نسمع عن قتل تانى لشاب فى نفس اليوم بأيد الشرطة..
الخبر شوفته فى اكونت الد\ مجدى شرقى و جمعته هنا :

معتز أنور سليمان نايف قتل برصاصة في الصدر فجر اليوم الخميس الموافق 27-10- 2011 بعد خلاف مع ملازم بسيارة النجدة على أولوية المرور

قام الملازم من سيارة النجدة بإطلاق 4 رصاصات باتجاه معتز و اخترقت صدر معتز الرصاصات و رصاصة أخرى أصابت زميل له بجانب أذنه ولم يصب بأذى

الملازم نقل الضحية إلى مستشفى زايد (كتر خيره) بعد أن فارق الحياة.. تجمهر أهالي القتيل وقاموا بإحراق سيارة النجدة بعد فرار الضباط منها

جثة معتز وصلت مستشفى زايد التخصصي جايباه عربية النجدة بطلق ناري في الظهر وخارج من الصدرالضابط كان عايزالدكتور اللي استقبل الحالة يركب أي

كانيولا ويكتب تقرير إن الحالة ماتت في المستشفى،الدكتور رفض لأن معتز كان مات الملازم هرب من المستشفى و3 آخرين لقسم زايد وطلب حماية القسم

الموقف أدى الى تمرد أفراد الداخلية المكلفين بحماية المنشآت العامة في زايد وإمتناعهم عن الذهاب للعمل خوفا من عمليات إنتقامية

الطبيب بعد أن لقي تجمهر رهيب من الأهالي و عايزين يحرقوا العربية جوه المستشفى ...قال لهم بس كده غلط عشان المرضى .اقتنعوا وجروها وحرقوها بره

أمين الشرطة الموجود في نقطة المستشفى هرب ولبس قميص برتقالي وكاب..وأصبحت المستشفى بدون تأمين.الكل تقريبا و برواية واحدة،خلاف على أولوية مرور

أبو القتيل شيخ عرب في أكتوبر-معرفش يعني إيه شيخ عرب- وبيتوعد بالانتقام بشدة من الداخلية.. القتيل 24 سنة ،وحيد على 7 بنات كما قيل

جثة معتز الآن في مشرحة زينهم بعد أن تم نقلها صباحا من مستشفى زايد عُقدت جلسة بين والد القتيل ومأمور قسم زايد وبعض المسؤولين من الداخلية

لاحتواء الازمة،في نفس الوقت الذي قامت فيه النيابة بالتحقيق مع الضابط

....

الله يرحمه و يرحمنا معــاه
مش عارفة هنجيب حقه هو و عصــام ازاى و احنا لسه مجبناش حق خالد سعيـد..
ونزول مليونيات تانى بقى عامل زى الضحك على الدقون
محدش بيفرق معاه نزولنا و الشعب بيكرهنا كل يوم اكتر من اللى قبله

ارهاصة فكرية

مشكلة الانسان انه يعتقد ان صلته بربه تعني ان يؤمن به ايمانا قلبيا ولا يأتي افعالا لتؤكد هذا الايمان وتلك المحبه مرارا وتكراراً..المحبة التى تنقلب الى افعال شتى عندما يكون الحب لبشرى و يخطىء عندما يعتقد ان الاسلام ليس كلمة على مسمى و ان المعنى يختص بالتسليم لوجه الله و الايمان به و برسوله فقط ..و لا يشمل ايضا ان يكون مسلما بما يأتيه ربه من اختبارات جديرة بتحطيم تلك الثقة بالله, الا لمن يؤمن ان الايمان بالله لا يعنى ان تحصل على معجزات فورية لكل ما تعانيه..ولكنه اختبـار يكاد يكون لدى البعض قاسيا لكى تزداد اسلاما بربك..تيقن ان ما تلاقيه سوف تجد ما يقابله من جوائز و اكثر بكثير عند لقاء ربك..و ياله من امتحان ان تصبر على مشاكل الدنيا التى لا حصر لها و تنظر الى ربك و انت تدعو ان يثيبك على ما صابك ولا تجد مفتاحا سحريا ينزل لك من السماء فى الحال..نعم فالاسلام ليست مجرد كلمة :))

شهادة المشير طنطاوى فى محاكمة مبــارك

شهادة المشير كما يرويها الصحفى محمد الجارحى على حسابه على التويتر :

س١ : حصل اجتماع يوم 22 يناير، هل ورد إلي رئيس الجمهورية السابق ما دار في هذا الاجتماع وما أسفر عنه وما كان مردوده ؟

ج1 : الاجتماع كان برئاسة رئيس الوزراء واعتقد أننه بلغ

س2 : بداية من أحداث 25 يناير وحتي 11 فبراير هل تم اجتماع بينك وبين الرئيس السابق حسني مبارك ؟

ج2 : ليست اجتماعات مباشرة ولكن يوم 28 يناير لما أخذنا الأمر من السيد رئيس الجمهورية كان هناك اتصالات بيني وبين السيد الرئيس ؟

س3: ما الذي أبداه رئيس الجمهورية في هذه اللقاءءات ؟

ج3: اللقاءات بيننا كانت تتم لمعرفة موقف القوات المسلحة خاصة يوم 28 وعندما كلفت القوات المسلحة للنزول للبلد ومساعدة الشرطة لتنفيذ مهامها يتبع

ج٣-2: كان هناك تخطيط مسبق للقوات المسلحة وهذا التخطيط يهدف لنزول القوات المسلحة مع الشرطة وهذه الخطة تتدرب عليها القوات المسلحة يتبع

ج٣-3: القوات المسلحة بتنزل لما الشرطة بتكون محتاجة المساعدة وعدم قدرتها علي تنفيذ مهامها وأعطي الرئيس الأمر لقائد القوات المسلحة - يتبع

ج٣-4 : أعطي الرئيس الأمر لقائد القوات المسلحة اللي هي نزول القوات المسلحة لتأمين المنشآت الحيوية وهذا ما حدث

س4 : هل وجه رئيس الجمهورية السابق المتهم محمد حسني مبارك أوامر إلي وزير الداخلية حبيب العادلي باستعمال قوات الشرطة القوة ضد المتظاهرين؟ يتبع

س٤-2: استعمال قوات الشرطة القوة ضد المتزاهرين بما فيها استخدام الاسلحة الخرطوش والنارية من 25 يناير حتي 28 يناير ؟

ج4 : ليس لدي معلومات عن هذا واعتقد ان هذا لم يحدث

س5 : هل ترك رئيس الجمهورية السابق للمتهمين المذكورين من أساليب لمواجهة الموقف ؟
ج5 : ليس لدي معلومات

س6: هل ورد أو وصل إلي علم سيادتك معلومات أو تقارير عن كيفية معاملة رجال الشرطة ؟

ج6 : هذا ما يخص الشرطة وتدريبها ولكني أعلم ان فض المظاهرات بدون استخدام النيران

س7 : هل رصدت الجهات المعنية بالقوات المسلحة وجود قناصة استعانت بها قوات الشرطة في الأحداث التي جرت؟
ج7 : ليس لدي معلومات

س8 : تبين من التحقيقات إصابة ووفاة العديد من المتظاهرين بطلقات خرطوش أحدثت إصابات ووفيات..هل وصل ذلك الأمر لعلم سيادتك وبم تفسر ؟

ج8: إنا معنديش معلومات بكده.. الاحتمالات كتير لكن مفيش معلومة عندي

س9 : هل تعد قوات الشرطة بمفردها هي المسئولة دون غيرها عن إحداث إصابات ووفيات بعض المتظاهرين ؟
ج9 : إنا معرفش ايه اللي حصل

س10 : هل تستطيع سيادتك تحديد هل كانت هناك عناصر أخري تدخلت ؟
ج10 : هيا معلومات غير مؤكدة بس اعتقد ان هناك عناصر تدخلت

س11 : وما هي تلك العناصر ؟
ج11 : ممكن تكون عناصر خارجة عن القانون

س12 : هل ورد لمعلومات سيادتك ان هناك عناصر اجنبية قد تدخلت ؟
ج12 : ليس لدي معلومات مؤكدة ولكن ده احتمال موجود

س13 : وعلي وجه العموم هل يتدخل الرئيس وفقا لسلطته في ان يحافظ علي أمن وسلامة الوطن في إصدار أوامر أو تكليفات في كيفية التعامل ؟

ج13 : رئيس الجمهورية ممكن يكون أصدر أوامر - طبعا من حقه ولكن كل شئ له تقييده المسبق وكل واحد عارف مهامه

س14 : ولمن يصدر رئيس الجمهورية علي وجه العموم هذه الأوامر ؟

ج 14 : التكليفات معروف مين ينفذها ولكن من الممكن ان رئيس الجمهورية يعطي تكليفات مفيش شك

س15 : وهل يجب قطعا علي من تلقي أمر تنفيذه مهما كانت العواقب ؟

ج15 : طبعا يتم النقاش والمنفذ يتناقش مع رئيس الجمهورية وإذا كانت الأوامر مصيرية لازم يناقشه

س16: هل يعد رئيس الجمهورية السابق المتهم محمد حسني مبارك مسئول مسئولية مباشرة أو منفردة مع من نفذ أمر التعامل مع ألمتظاهرين الصادر منه شخصيا

ج16 : إذا كان أصدر هذا الأمر وهو التعامل باستخدام النيران أنا اعتقد ان المسئولية تكون مشتركة وأنا معرفش ان كان أعطي هذا الأمر أم لا

س17: وهل تعلم ان رئيس الجمهورية السابق كان علي علم من مصادره بقتل المتظاهرين ؟
ج17: يسأل في ذلك مساعديه الذين ابلغوه هل هو علي علم أم لا

س18: وهل تعلم سيادتكم ان رئيس الجمهورية السابق قد تدخل بأي صورة كانت لوقف نزيف المصابين ؟

ج18 : اعتقد انه تدخل وأعطي قرار بالتحقيق فيما حدث وعملية القتل وطلب تقرير وهذه معلومات

س19: هل تستطيع علي سبيل القطع والجزم واليقين تحديد مدي مسئولية رئيس الجمهورية السابق عن التداعيات التي أدت إلي إصابة وقتل المتظاهرين ؟

ج19 : هذه مسئولية جهات التحقيق

س20: هل يحق وفقا لخبرة سيادتكم ان يتخذ وزير الداخلية وعلي وجه العموم ما يراه هو منفردا من اجراءات ووسائل وخطط لمواجهة التظاهرات دون العرض علي رئيس الجمهورية؟

ج20: اتخاذ الاجراءات تكون مخططة ومعروف لدي الكل في وزارة الداخلية ولكن في جميع الحالات يعطيه خبر بما يخص المظاهرات ولكن التظاهر وفضه - يتبع

ج٢٠-2 : ولكن التظاهر وفضه هي خطة وتدريب موجود في وزارة الداخلية

س21 : وهل اتخذ حبيب العادلي قرار مواجهة التظاهر بما نجم عنه من إصابات ووفيات بمفرده بمساعدة المتهمين الاخرين في الدعوى المنظورة - يتبع

س٢١-2 : وذلك من منظور ما وصل لعلم سيادتك ؟
ج 21 : معنديش علم بذلك

س22 : علي فرض إذا ما وصلك تداعيات التظاهرات يوم 28 يناير إلي استخدام قوات الشرطة آليات مثل اطلاق مقذوفات نارية أو استخدام السيارت لدهس -يتبع

س22-2 : سيارات لدهس المتظاهرين..هل كان أمر استعمالها يصدر من حبيب العادلى يصدر من حبيب العادلى ومساعديه بمفردهم ؟

ج 22 : ما أقدرش أحدد اللي حصل أيه ولكن ممكن هو اللى اتخذها وأنا ما أعرفش واللى اتخذها مسئول عنها

س23: هل يصدق القول تحديداً وبما لا يدع مجالاً للشك أو الريبة أن رئيس الجمهورية السابق لا يعلم شيئاً أو معلومات أيا كانت عن تعامل الشرطة يتبع

س23-2 : بمختلف قواتها أو أنه لم يوجه إلى الأول سمة أوامر أو تعليمات بشأن التعامل والغرض أنه هو الموكل إليه شئون مصر والحفاظ على أمنها ؟

ج23 : أنا ما أعرفش اللى حصل أيه لكن أعتقد إن وزير الداخلية بيبلغ وممكن ما يكونش مش عارف بس أنا ما أعرفش

س24 : هل هناك اصابات أو وفيات لضباط الجيش ؟
ج 24 : نعم هناك شهداء

س25 : هل تعاون وزير الداخلية مع القوات المسلحة لتأمين المظاهرات ؟
ج 25 : لأ

س26 : هل أبلغت بفقد ذخائر خاصة بالقوات المسلحة؟
ج26: مفيش حاجة ضاعت لكن هناك بعض الخسائر في المعدات واتصلحت ومفيش مشكلة

س27: هل أبلغت بدخول عناصر من حماس أو حزب الله عبر الأنفاق أو غيرها لإحداث إضرابات ؟

ج27 : هذا الموضوع لم يحدث أثناء المظاهرات واحنا بنقاوم الموضوع ده واللي بنكتشفه بندمره وإذا كان فيه حد محول لمحكمة فهذا ليس أثناء المظاهرات

س28: هل تم القبض على عناصر أجنبية في ميدان التحرير وتم إحالتهم للنيابة العسكرية
؟ ج28: لا ..لم يتم القاء القبض على أى أحد

س29: فى الاجتماع الذي تم يوم 20 يناير هل تم اتخاذ قرار بقطع الاتصالات؟
ج29 : لم يحدث

س30: بعض اللواءات قالوا طلب منا فض المظاهرات بالقوة..هل طلب من القوات المسلحة التدخل لذلك ؟

ج30: أنا قلت فى كلية الشرطة في تخريج الدفعة إن أنا بأقول للتاريخ إن أي أحد من القوات المسلحة لن يستخدم النيران ضد الشعب

كده الشهادة خلصت..

تونس تنادى..

الظاهر ان الواحد افتكر ان تونس نجحت فى ثورتها و متبقاش غير القليل و كنا دايما بنتابع
تقدمها فى الثورة بعد هروب بن على و بنقارن و بنتحسر على الخطوات الى بياخدوها قبلينا
وبندعو الله اننا نحصلهم و لو لمرة نسبقهم فى حاجة من نفسنا :)
بس على ما يبدو ان تونس تعانى من الثورة المضادة اكتر مما كنا نتخيل و ان الاخبار عنها فى منتهى الضيق
وليست بالوردية الى كنا بنأملها..
شوفت امبارح تدوينة لتونسى شقيق ينادى و يعاتب المصريين على قلة اهتمامهم بالثورة التونسية بعد ما قمنا بثورتنا
وطبعا ليه حق فى ده ..لان رفع الاعلام فى الميدان ليس بالكافى اكيد كمؤازرة للشعب التونسى الجميل:)
يـاريت تقروا التدوينة بتاعته و تعرفوا معانتهم من الثورة المضادة و تنشروها فى كل مكان
وتتواصلوا معاه للى عنده اى نصايح يحب يوجهاله..

http://tounsiwaftakhir.blogspot.com/2011/04/blog-post_24.html

وادى لينك لفديوهات عن المظاهرات التونسية اللى للأسف مبتلاقاش الدعم الاعلامى الكافى وسط الاحداث الكثيرة المتلاحقة للثوارت العربية
فيـاريت برضه ننشره و نشوف الفديوهات دى :)
http://www.youtube.com/view_play_list?p=BE94DA8D17983A34


ودى تدوينته التانية بيشكر فيها من تفاعلوا معاه من المصريين..
وفيها اخبار اخرى عن الثورة التونسية..

http://tounsiwaftakhir.blogspot.com/2011/04/blog-post_25.html

مرة تانية يـاريت النشر فى كل حتة
والى يشوف ثورة غيره المضادة تهون عليه ثورته المضادة برضه :)))

الفيسبوك اتحجب فى مصر ادخل هنا لفكه..the facebook is blocked in egypt

الفيسبوك اتقفل عندك مش عارف تعمل ايه؟؟؟؟

كيفية فك حجب الفيسبوك فى مصر.. الطرق كثيـرة جدا و لكنى احب ان اقول اسهل و اسرع طريقة فيهم
و هى الحصول على برنامج يسمى tor bundle حجمه صغير جدا 15 ميجا بايت..يمكنكم من الدخول عبر الفايرفوكس firefox browser و من هناك لا تحتاج الى مواقع لفك البروكسى او اى شىء..فقط تصفح كما تتصفح فى العادى..
هاحط هنا اللينك و يــاريت تنشروا البرنامج ده فى اى حته..علشان الناس كانت معتمدة على الفيسبوك او التويتر فى معرفة الاخبار
ولازم نقف ضد الحجب ده..

ده لينك البرنامج:
http://www.torproject.org/download/download.html.en#warning

اختاروا الى يناسبك جهازكم و السيستم بتاعكم..
وبعد التنزيل هتفتحوا البرنامج الى نزلتوه مش الفايرفوكس على طول..والبرنامج هو الى هيفتح الفايرفوكس بعد ما يظبط السيرفر بتاعه علشان تدخلوا على اى سايت
واى حد لديه اى مشاكل او واجهته مشكلة ومش قادر يفتحه يقولى...

ارجو النشر ..