ممدوح عباس اه و مرتضى منصور لا

انتهت امبارح انتخابات الزمالك ولاول مرة فى تاريخ الزمالك تبقى الانتخابات بالمنظر ده

من حيث المتابعة الاعلامية قبل و اثناء الانتخابات(تلات قنوات من الصبح لايف)و حضور اعضاء الجمعية العمومية للزمالك بالمنظر ده

محصلتش فى تاريخ اى نادى قبل كده  و اكيد الكل عارف ليه المرة دى الناس كلها راحت

اه انا عن نفسى مروحتش..بس لان ماما هى الى كان ليها حق التصويت و ماكنش ينفع الست تروح لوحدها وسط الهوجه الى 

الواحد شافها هناك دى..بس فعلا فرحت بالنتيجة الى طلعوا بيها فى الاخر

الواحد كان متابع طول اليوم و سهرنا لغايه الفجر علشان نعرف و نتأكد و نفرح  بالنتيجة

حتى لو كان ممدوح عباس مش هو اصلح من يقود الزمالك بس مين غيره دلوقتى رشح نفسه و ينفع يبقى قدها

كان نفسى دكتور عامر يرشح نفسه الراجل اثبت انه بيعرف يدير نادى كبير..

ولكن اهم حاجه انى مشفش الاستاذ  مرتضى  منصور ده ماسكها!!

بجد كانت هتبقى نهاية الزمالك بحق وحقيقى

انا فى حياتى مشفتش شخصية بتعيش على  اهانة الاخرين او اكاله الاتهامات ليهم بالمنظر ده

احنا كرهنا الخناقات و التعصب و القرف الى الزمالك كان عايش فيه كل السنين الى فاتوا دوله

احنا عايزين واحد يمسك النادى  بهدوء من غير بروباجندا و قضايا و لو محصلش ايه هاوديك على القسم

..

ممدوح عباس مش الاحسن بدليل  انه من اوائل تصريحاته امبارح بعد الرئاسة انه هيرجع جمال و شيكا و اجوجو

يا خرابى ..اول القصيدة كفر..بس هاقول لسه الايام جاية و هنشوف هيعملها فعلا ولا لاء و لما هيرجعوا هايبقوا عاملين ازاى

انا كزمالكاوية شفت النادى و اللاعيبة  عاملين ازاى اقدر اقول بكل ثقة انى مش عايزه لا جمال ولا شيكا بجد..

الى مش عايز النادى ولا هيتجنن عليه ,يروح يشوف حتة تانية احسن..

بكل بساطة و بهدوء ولا انا عايز امشى و تهديدات!!

الزمالك اصلا خلص الموسم على المركز السادس يعنى وجودكم عدم وجودكم مفرقش كتير يا لاعبيتنا يا كبار..

فالى هيفرق بجد انكم تاخدوا شنطكم  بجد و تمشوا  و تأدوا فى النادى الى يعجبكم 100% 

او يأما تخليكم فى الزمالك و برضه نشوف ال 100% ..

لان الزمالك  مش عايز من حد احسان  ولا شفقة و لعبكم معاه مش تؤدية واجب..

دى كلمة شيفاها طالعة من اى زمالكاوى لاى لاعيب دلوقتى فى النادى

و نفسى الكل يفهم ان زمن الى كان الزمالك فيه بيسامح ماعدش موجود..

يا فيه عطاء يا فيه قضايا:P

وربنا يبعد عنا القضايا يااارب

the first comedy rumble in egypt!

hello cairo
and welcome to the first ever comedy rumble in egypt!!

دى اول حاجه اتقالت فى الكوميدى رامبل فى الحفلة الى اتعملت النهارده فى دار المؤتمرات..,وهى للى ميعرفش عباره عن stand up comedy
اى كوميديا على الواقف..النوع ده من الكوميديا يهتم بكوميديا الموقف(نظام انا وانا ماشى اتكعبلت و..)..مش على الافيه(مرة واحد اتكعبل:))

انا بحب جدا النوع ده من الكوميديا لانك بتحس انها حاجه تمسك انت بشكل او بأخر وبتلاحظها فى كل حاجه حواليك
ولو مخدتش بالك هتخليك تاخد بالك منها..فهى كوميديا مقبولة ,اه هى بتعتمد على السخريه على الغير بدرجه كبيره بس على الاقل السخريه فى مكانها و ممكن تتعدى عادى مش زى النكت الى بتتقال دايما على حبايبنا الصاعيده و من وراهم البورسعيديه

...

الحفلة كان معمولها بروباجاندا كبيره وحسيت ان الناس عرفت ان فى حفله اه جايز مش كلهم او اغلبهم عارف يعنى ايه الكوميديا على الواقف
وغالبا مسمعوش حاجه زيها قبل كده..بس كلمه كوميديا على ما اظن هتشد الناس فى الوضع المنيل الحالى انهم يقبلوا يروحوا اى حاجه

العدد الى جه فى الحفله الى انا حضرتها الى كانت الحفله الصباحيه(مش صباحيه اوى كانت الساعه 4 بس كانت فى واحده تانيه الساعه 9) كان الناس فيها كتااار فعلا
مش زى مانا توقعت هايبقوا حبه صغيرين خصوصا انه اكيد ان الحفله بتاعه الساعه 9 هى الى هتاخد الاهتمام من الناس اكتر(ده يوم جمعه برضه و الناس عايزه تسهر)


يمكن الحاجه الى استغربتها شويه كانت اسعار التذاكر الى نسبيا عاليه اول تذكره كانت 75 ,125,175,215 اه هى ال75 ادت دورها بكفائه و اقتدرا تحسد عليه(كنا قاعدين و شايفين (اه مش وشوشهم بس عادى يعنى هانعمل ايه بيها(هو انا لازم ااقول كده علشان احسس نفسى ان مفيش حاجه ناقصانى برضه:))


بس فعلا كانت حفلة جاااامده جدا و الضحك مبطلش و ايدينا وجعتنى الى اقصى حد و زورى اشتكى من كتر صيحه التشجيع(الوووه) الشهيره:)
(واه انا من الناس الى بتعمل ووه و توجع ودانكم :P)يعنى لو شوفتونى فى حفلاات ابعدوا عنى احسن:)


المؤديين الكوميدين فى الحفلة كانوا:
1-احمد احمد:مصرى الجنسية بس كان عايش فى امريكا طول عمره هو كان قايم بدور المقدم ليهم و ان كان ده خلااه ميؤديش فقره كامله على بعضها نحس فيها بخفه دمه الى بجد(اه هو كان خفيف الدم جدا) بس هم اكيد غطوا عليه بفقراتهم الاطول منه


2-جورج عزمى

3-معتز عطا الله
4-شريف عزب

5-ماز جوربانى

6-angelo tesrouchasمش عارفه اسمه بيتكتب ازاى بالعربى هو يونانى الاصل مولود و عايش فى كندا و بجد ده اكتر واحد فيهم ضحكنا لدرجه العياط..بجد فعلا خفه دمه رهيبه
7-تيد اليكساندرو
8-اكرم حسنى(غالبا كل الناس عرفاه يعنى علشان شخصيه ابو حفيظه) هو اتكلم عليها من بعيد بس مطلعش بيؤديها يعنى و ده شىء حلو لانى ماكنتش هاحب انى اشوفه بحاجه مكرره الواحد عايز يشوفه وهو بيحكى كوميديا الموقف الى فعلا كان بارع فيها

الحفله عامة كانت وهميه واتكلموا فيها فى كل حاجه
ولم يسلم الامر من ذكر بوش و الجزمه او باراك
بس اكتر حاجه عجبتنى فى الحفله غير يعنى الضحك وكده التنظيم و الاهتمام بالتفاصيل الى فيها
حسيت ان الناس الى ماسكينها فعلا Very professional
زعلى الوحيد هايبقى على انه مفيش حفله تانيه قريب
لانها حاجه هاروحها كل اسبوع لو لقيتها
للناس الى ميعروفهاش ادخلوا على يوتيوب و اعملوا سيرش على اسامى الناس الى كتبتهم
و هتلاقوا فديوهات تشوفوا هتعجبكم الفكره ولا لاء.

من غير عنوان.

بقالى كتير اوى مدخلتش كتبت اى حاجه هنا
داخله على سنتين بالتمام و الكمال
عارفه ان فى ناس مخلصين ليا(واخد بالك انت) بيعدوا هنا كل شويه يفتكرونى
وبجد انا بشكرهم على متابعتهم التحفه ليا دى
اه انا يبان انى بعت المدونة دى
بس انا لسه مبعتهاش
كتير ادخل عليها .يجيلى نفس اكتب و اتراجع فى اخر ثانيه
معرفش ليه..!

يمكن دى تكون بدايه رجوع و يمكن تبقى كعادتى بكتب حاجه كل سنة مرة
بس حبيت فى مدونتى الى بتعبر عنى ان يبقى فيها ذكر وفاه والدى الله يرحمه
وبرجوكم الدعاء ليه
اه هى متأخره كونه توفى فى 21\11
بس زى ما قولت مينفعش مدونتى حبيبتى ميبقاش فيها حدث زى ده مكتوب
حبيت ادخل ااقول قد ايه انا مفتقداه..
فالحمدلله على كل حال

و..
انتظرونى!
او متنتظرونيش:>
مش عارفه بقى!!

زمالك واهلى

استرها يا رب
هى مش ناقصه الى هيحصل النهارده
بجد نفسى الزمالك مش يعمل فيا انا عمايله البايخه
اكسب بقى يا اخى خنقتنى
هو لازم كل مرة الواحد يقلق اوى كده حتى لو كان هو الافضل
يخرب بيتك يا زمالك يا مقلقنى كده



واحم رمضان كريم يا جماعه!


تحديث:
الى حصل حصل يا جماعه و الضرب فى الميت حراام

بخسر نفسى

بخسر نفسى
مع كل لحظه ندم على شىء كان او لم يكن
مع كل يوم يفوت لا بحقق جديد ولا حتى بموت!
مع كل مشهد دم عربى اتراق..حسيته ذنبى..وبعد شويه انسى الذنب
وكل مشهد فقر بيعدى قدام عيونى ..صدقونى ساكن فيا و بيزيد جنونى.
ياا صحابى ليه سيبتونى مش حساكم وبجد ده بيزيد همومى
وحتى اللقطة كوميديه حلوه اه ولكن مبتضحكش
وحتى البرائه راحت منى .ادور عليها ولا ااقولكم احسنلى مدورش.
يا جبال الحزن جوايا ادفنينى تحتيكى خلينى محسش بقى زهقت من الاحساس
وقولى لكل حبيب حاسب متقربش..ده الى قرب خسرته.والى بعد احسن انه مجربش
مع كل ضحكة اخاف لتكون الاخيره ,نفسى تطلع من قلبى بس ليه مبتطلعش
اضحك على نفسى وااقول هاكون بخير.
يمكن بكره يكون احسن وترجعلى نفسى

معلش انا لسه صوغيره يا جماعة

انا بجد مكسوفه ..مكسوفة الى اقصى حد.
امى انا تبقى حزب وطنية!؟معقوله دى
طيب ليه و على انهو اساس..
هى مبتشوفش الى بيحصل فى البلد مبتنزلش الشارع
هى الصراحه بتنزل..طيب هو فى ايه ؟!
ازااى مقتنعه ان بابا مبارك و ماما سوزان واونكل جمال كويسين يعنى وولاد حلال و مصر مجابتش زيهم ابدا يا جماعة
انا احترم رايها الى اقصى درجه ولكن على انهو اساس تتنفض و تقوم و ماتقعدش لما تسمع ارائى
ومش على لسانها كلمه غير بكرة تكبرى وتفهمى اصلك صوغيره
يا حلاوة ياولاد يعنى مصر مش وحشة ولا طالع عين الى فيها علشان انا صوغيره وبكرة باذن الله كده
لما اكبر ويكون عندى عيال وجوز ادعى عليه ربنا ياخده تبقى مصر تمام و امى و ام الدنيا كمان
يا حلاوة يا ولاد كمان مرة
امال الاخوة الى معدى الشيب على شعورهم دوله شايفين الى انا شيفاه على انهو اساس برضه
لا كده انا من هذا المنبر بقولهم انتوا لازم تكشفوا لانكم اكيييد عقلكم لسه صوغير
مش معقوله الى بيحصل ده!!ازاى تسيبوا نفسكم بالمنظر ده
انا شايفه ان ماما واخده الامور فى تلات محاور (زى محمد صبحى فى فارس بلا جواد)تعالوا كده نشوف

اول محور:
بيقولك ان الجرايد المعارضه و الناس الى بتطلع دى كلها ما هم الا شويه حرامية بينهبوا فلوس من بره و نفسهم يا ضنايا ياخدوا كمان من جوا علشان كده مش هيسكتوا الا لما يمسكوهم مناصب هم كمان
فالناس مالهاش غير الجرايد الحكوميه يا ناس هو فى احسن منها..
ياخرابى على مقالتها الى كلها عن تقدم مصر ووصلها للمراتب العليا
يعنى فعلا هى عندها حق حد يسيب حد عمال يقنعه انه مفيش احسن منه فى الدنيا علشان يروح لحد بيقوله انت واقع فى حفره ومش هتخرج منها يا ولدى!بقى ده اسمه كلام ميصحش مينفعش!

نيجى بقى لتاانى محور
بابا و ماما و اونكل كمان ولاد حلال اه والله و قلوبهم علينا ويارب يخليهم لينا دايما كده يارب قولوا امييين
دايما كده ظاهرين فى التلافزيون و اشى ندوات و اشى لقاءات و شويه افتتحيات يعنى من الاخر يعنى
الناس دى بتعمل الى عليها وزياده
ياجدعان دوله حتى مش عارفين يقعدوا فى بيوتهم ثانيه
بقى بذمتكم فى حد يسيب بيته (قصور اقصد يعنى)ويخرج يعمل الى بيعملوه ده غير علشان هم وطنين
اللهم ما زيدهم وطنيه يااارب
ده حتى المصايف يا جماعه حتى المصايف المخصصة ليهم مش بيروحوها كلها و اخرهم مصيف ولا اتنين
من خوفهم علينا والله..بذمتكم مش ناس طيبين والله

وتاالت محور و اهم واحد يعنى:
طالما انت بتمشى فى الشارع و مبتلاقيش حد قالع هدومه يعنى لامؤاخذه يعنى
و قاعد يصوت ويقول انه عايز ياكل ويخرب بيت الحكومة يبقى اكيد مصر بخير
مصر بخير يا سوسن و يا حسنية

وانا بجد احب اطمن ماما واقولها السنين اهى جايه و بنتك تكبر وتعقل و متبقاش صوغيره

وتحية للحزب الوطنى !
والله ولعبتها صح

انا مش مصدقة نفسى!!!

لا بجد فعلا مش مصدقه نفسى
انا على البلوج الحبيب بتاعى
اخيـــــــــــــرا
انا بجد اسفه جدا جداجدا على الوقت الرهيب الى انا غيبت فيه الى اكيد اكيد الناس نسيتنى فيه
بس كان عندى شويه ظروف تحفه فعلا يعنى..
بس ااقدر ااقول انى رجعت او بحاول ارجع على الاقل يعنى..
بجد ومش ليكم عندى حلفان وحشتونى و البلوج ووحشنى و حتى عم محمد البواب وحشنى هو كمان!

it's my birthday!

it's my birthday
althought i don't feel like it
the eid had stolen from me my joy:(
bad bad eid
just saying hapPY birthday to me

العار ولا التار

"مقدمة لابد منها"

مش عارفه انا ايه الى جاب محتوى البوست ده للعنوان
بس العنوان بتاعه عاجبنى بقى فقولت لازم احطه
......
"عندما تعشق الشيكولاتة"
الفصل الاول
اتفقنا انا واخويا وثروة ومحمد ياسر نروح حفلة محمد منير فى الاوبرا
الى كانت امبارح دى وطبعا الحفلة كانت جامده واليوم لذيذ
طبعا كل شىء كان تحفه باستثناء بسيط جدا
انى انا ومحمد اخويا اتأخرنا جدا على الحفلة وقولنا نضيقها مشى بالعربية بدل ما ندخل
ونبقى ناقبل ثروة ومحمد ياسر بعد الحفلة
كل ده عادى برضه باستثناء بسيط جدا برضه(كترت الاستثنئات اوى انا عارفه معلش)
انهم ميعرفوش اننا محضرناش الحفله فاكرن اننا موجودين معاهم بس مش عارفين نوصلهم لان طبعا الحفله زحمة
واحنا اتاخرنا ومدخلناش مع بعض وهنا ابتدت الخطة الشيطانينة
.........

"عندما يتفق توم مع جيرى"

انا:ايه رايك يا مودى نعملها عليهم ونقولهم اننا فى الحفله فعلا ولما يخرجوا نقعد نشتلغهم
محمد:جميل جدا (ضحكة شيطانيه بس دى من خيالى بس الموقف كان محتاجها اوى)

انا:اكتر حاجه نضمنها فى الموضوع ان منير اكيد هيلبس حاجه غريبه فلازم نعلق عليها
هنقولهم شفتوا منير كان لابس ايه ونندهش ونسخر وهم زى الهبل هيكملوا المعلومة باه كان لابس ….وتكمل العملية(فظيعة جدا انا)

……

"تفاصيل خطة النصر والعبور الكبير"

حظنا اننا روحنا الاوبرا فى نفس التوقيت الى الناس خرجوا فيه واتصلنا بيهم بقى وقولنالهم انتوا فين احنا طلعنا ومستنينكم بره

وبعد السلامات بقى والذى منه:
انا: ايه رايكم فى الحفله جباره مش كده
ثروة ومحمد ياسر: جدا جدا

انا ومحمد عاملين نفسنا بقى ايه طهقنا من الدوشة و قال ايه السماعات يا عينى كانت هتموت سمعنا وتخلينا مش سامعين حاجه

طبعا ركبنا العربيه وقعدنا ندور على مكان نتسحر في ورحنا على كوك دور وقعدنا بقى نكمل الفصل عليهم

شوية نقولهم اغانى يقولونا ماكنتش موجوده فىالحفله متاكدين انكم حضرتم

ونقعد نضحك ونقول انتم عارفين مش بنسمع منير بقالنا كتير بس الى جنبنا كان يقولنا دى اغنيه اسمها كذا

واحنا بنعوم على عومة بقى الواد شارب اه بس منكدبوش يعنى

وشوية نقول اغانى والحمدلله تطلع كانت فى الحفله ويتطمنوا ان احنا مجرالنش حاجه وكنا بنسمع اوبرا عايدة بدلا من منير

كل شىء تمام بنتكلم عن الاغانى و لبس منير وحتى الشرب فى الحفله

حتى جائت اكتر حاجه اكدتلهم اننا اكيد اكيد حضرنا يعنى
انا: شفتهم الخناقه الى حصلت فى النص الكبيره دى
اخويا بصلى باستغراب بقى الى هو وسعت منك دى يا منار
بس ثورة ومحمد ياسر قالوا اااه شوفناها دوله كانوا جاين علينا واحناب عدنا وقعدوا يضحكوا
اخويا مقدرش يمسك نفسه قعد يضحك يقولى جبتيها ازاى يابنت الايه انتى

قوله عيب عليك كنت حاضره بس انت مش عارف

طبعا قعدنا نضك كتير عليهم وفى الاخر وجهناهم بالحقيقه المرة وقولنالهم:
فى اعتراف قاله منير فى الحفله ايه رايكم فيه

طبعا مفهموش اعتراف ايه

قولنالهم مش منير قال فى الحفله: ان محمد و منار محضروش الحفله اصلا يا ثروة ومحمد وعليكم واحد

وقعدنا نضــــحك بقى طبعا ثروة بلمت شوية بس قعدت تضحك ومحمد ياسر اخد وقته وخلانا نكرر الكلام علشان يستوعب الموقف كويس

بس فعلا اكتر حاجه كانوا مستغربينالها عرفت منين ان كان فى خناقه لان دى الحفله الوحيده الى فى ناس اتخانقوا فيها

هى جت حظ بقى علشان ده كان يوم مبروك واحنا فى رمضان

ومحمد وثروة عليكم واحد
……

"نصيحة اخوية"
متصدقوش ان محمد ومنار بيحضرواا الحفلاات الا لما يكونوا واقفين جانبكم

بعضا من الخصوصيه نرجوكم!

حد فيكم قابل موقف كان فيه بيتكلم فى التليفون فى موبيله رن
و الى معاه اتومتيكى سئله مين؟؟

اقدر ااقول مين مقابلوش اصلا..!

كنت راكبه العربيه مع بابا و السواق..

و موبيل السواق رن بابا سئله مين بيتصل بيك؟

سؤال يعنى غريب حبتين!

هو بابا ماله هو مين الى بيتصل بالسواق؟

و افرض كان حد مش عايز يقول عليه..

يعنى هو فضل ساعه يدور على اجابه و قال البيت فى الاخر

يا اخى اتحرجتلك..

و قعدت افكر طيب ماهو انا كمان لما صاحبتى حد بيرنلها هاسئلها مين

و ليه و فين و الاسئله الغريبه الى تحس انها لازمه يعنى و لو مسئلتش تبقى فيك حاجه غلط!

طيب هل فى خصوصيه بين الغرباء و مفيش بين الاصحاب..

شيلناها اتوماتيك اول ما دخلنا فى مرحله الصحاب..

طيب هو ده فضول .. حب معرفه..

حب دس انفك فيما لا يعنيك..

ولا دى علم لا يضر!

وياترى هو كله بيسئل مين الى بيتصل دى ولا دى حاجه فى العايله:)!